Koronaviruset (CoV) janё një familje e madhe virusesh, që shkaktojnë sëmundje nga më të lehtat deri tek ato tepër të rënda. Në 31 dhjetor 2019, pati disa raste me pneumoni në Wuhan, provinca Hubei, Kinë ku shumica e tyre raportonin ekspozim në një treg të madh të produkteve të detit, ku shiteshin shumë lloje të kafshëve të gjalla.
Cilat janë simptomat e një personi të infektuar me koronavirus?
Simptomat varen nga virusi, por shenjat e zakonshme përfshijnë simptomat e aparatit të frymëmarrjes: ethe, kollë, gulçim dhe vështirësi në frymëmarrje. Në raste më të rënda, infeksioni mund të shkaktojë pneumoni, sindromë të rëndë respiratore akute, insuficiencë të veshkave, madje edhe vdekje.
Shpesh COVID-19 nuk e kapin që në fillim, pasi simpomat janë të ngjashme me atë të gripit sezonal. Nisur nga kjo, studiues të Universitetit të Kalifornisë analizuan të dhënat e pacientëve me COVID-19 dhe me grip, për të përcaktuar një rend më të zakonshëm të simptomave.
Për të parashikuar rendin e simptomave të Covid-19 dhe gripit, studiuesit analizuan të dhënat e Organizatës Botërore të Shëndetësisë (OBSH) për mbi 55.000 raste të konfirmuara me COVID-19 në Kinë. Ata gjithashtu studiuan edhe të dhënat për simptomat e gripit, të mbledhura në vendet e Amerikës së Veriut, Europës dhe hemisferës jugore midis viteve 1994 dhe 1998.
Studimi doli në përfundimin se pacientët me grip sezonal, kanë fillimisht kollë përpara temperaturës dhe etheve, ndërkohë që simptoma e parë e COVID-19 përgjithësisht është temperatura. Sipas gjetjeve, rendi i simptomave të COVID-19, zakonisht është kjo:
– temperaturë
– kollë dhe/ose dhimbje muskulare
– të përziera dhe/ose të vjella
– diarre
Studimi vuri theksin edhe te humbja e menjëhershme e nuhatjes dhe shijes, simptomë e rëndësishme që dallon COVID-19 nga gripi apo ftohja. Nuk ka një trajtim specifik për sëmundjet e shkaktuara nga koronavirusi, megjithatë, shumë nga simptomat mund të trajtohen në varësi të gjendjes klinike të pacientit.
