Aktorja që u bë dhe pjesë e “Big Brother VIP”, Monika Lubonja, është emëruar drejtoreshë e Kopshtit Zoologjik. Lajmin e ka bërë vetë me dije Lubonja, teksa ka qenë e ftuar në “Wake Up”. Aktorja tha se pasi zbuti njerëzit në BBV, tashmë e kanë angazhuar që të njëjtën gjë të bëjë edhe me kafshët e egra. Monika që u ironizua nga Ilir Shaqiri si një vajzë që mban dorën edhe në bakllava edhe në revani, tashmë do të paguhet si drejtoreshë e Kopshtit Zoologjik.
“Faleminderit, diplomacia pra, drejtoreshë e Kopshtit Zoologjik. Siç duket thanë, meqë zbuti ata njerëzit, do t’i zbusë dhe këta. Ata atje në BBV më deshën të gjithë. Aty realisht është bërë një punë shumë e mirë, aty me të vërtetë është bërë një qendër totalisht e re”, tha Lubonja.
E pyetur për tabelën që paralajmëronte prindërit për fëmijët e tyre, drejtoresha e re tha se këto mund t’i kenë vendosur vizitorët, që sipas saj, duan patjetër të shajnë diçka të bërë mirë.
“Këto tabela nuk janë të vëna nga ne. Do të jetë nga vizitorët që kanë për qëllim që të bëhen lajme dhe meme. Ajo që realisht më vjen keq është që ka personazhe publikë që e marrin dhe e postojnë. Jo gjithmonë duhet të kemi tendencën që për një gjë të bërë mirë, të kemi diçka për të thënë dhe ta shajmë më pas. Duhet vlerësuar e gjithë puna, deri tek ata njerëz që mirëmbajnë kafshët. Nuk pyeti njeri, a janë hapur vende pune?”, u shpreh Lubonja.