Në zgjedhjet e ardhshme të Maqedonisë së Veriut, do të kandidojë për herë të parë për kryeministër edhe një shqiptar. Bëhet fjalë për Naser Ziberin, i cili është prezantuar nga BDI pak ditë më parë si kandidat.
Në një intervistë për emisionin “Ballkan” në Abc News, Ziberi tha se një kryeministër shqiptar do të mundësojë që të gjitha komunitetet jo-shumicë, e në rend të parë shqiptarët, të ndjehen komodë e të barabartë në shtetin e tyre.
“Kryeministri i parë shqiptar, pra kryeministri shqiptar, do të mundësojë që të gjitha komunitetet jo-shumicë, e në rend të parë shqiptarët, të ndjehen komodë e të barabartë në shtetin e tyre në republikën e Maqedonisë së Veriut, pa pretendime për diskriminim dhe vënie në rend të dytë. Unë besoj fort që të gjithë qytetarët kanë qenë të dëshpëruar do të gjejnë shansin për një alternativë të tretë. Jam i bindur se jo vetëm shqiptarët, por edhe maqedonasit dhe komunitetet e tjera, do të japin mbështetje”, tha ai.
Kujtojmë se zgjedhjet parlamentare në Maqedoninë e Veriut do të mbahen më 15 korrik 2020.
