Mohoi akuzat për lëndën narkotike, Shpat Kasapi shkarkohet nga detyra e lartë

Pa mbushur një javë nga emërimi i tij si këshilltar, Shpat Kasapi është shkarkuar nga posti që i ishte dhënë. Para katër ditëve u bë i njohur lajmi që Artan Grubi, zv.kryeministri i parë i Qeverisë, si këshilltar kishte emëruar këngëtarin e njohur Shpat Kasapin, ndërkaq sot e ka shkarkuar nga posti. Lajmin e kanë përcjellë mediat në Kosovë, pak orë pasi Shpati tha me anë të një postimi në rrjetet sociale se asgjë nuk është e vërtetë çfarë shkruajnë për të.

Mediat në Maqedoni kanë raportuar mëngjesin e sotëm se këngëtari Shpat Kasapi, i cili mbante postin e këshilltarit të zv.kryeministrit të Maqedonisë së Veriut, Artan Grubi, është kapur me drogë të llojit kokainë.

Ndërkohë që vetë këngëtari, pas qarkullimit të këtij lajmi, ka reaguar përmes një instastory në profilin e tij të Instagramit. Ai ka hedhur poshtë të gjitha pretendimet, duke theksuar se ato janë vetëm shpifje.

Pavarësisht se këngëtari i hodhi poshtë lajmet që qarkulluan, kjo nuk e ka penguar Grubin ta shkarkojë nga detyra Shpat Kasapin. Shkarkimin e Kasapit e ka konfirmuar edhe vetë zëvendës kryeministri Artan Grubi për “Klan Kosova”.