Mjeku i njohur Pëllumb Pipero u ka bërë thirrje qytetarëve shqiptarë që të qëndrojnë në shtëpitë e tyre dhe të respektojnë masat dhe këshillat e mjekëve.
Lidhur me situatën e shkaktuar nga koronavirusi, Pipero shprehet se nëse nuk qëndrojmë në shtëpi, atëherë përmasat mund të jenë më të mëdha se në Itali.
“Ju lutem, nëse qëndroni në shtëpi atëherë do e kalojmë mirë këtë situatë. Por nëse jo, atëherë përmasat mund të jenë më të mëdha se në Itali pasi ne nuk jemi 60 milion”, tha Pipero.
Mjeku thekson se vendi aktualisht ndodhet në luftë të vërtetë dhe se të gjithë duhet të mbrojnë veten dhe të afërmit e tyre.
“Faleminderit të gjithë qytetarëve shqiptarë që na kanë mirëkuptuar dhe kam një qortim shumë të madh për ata që nuk na kanë dëgjuar dhe nuk po na dëgjojnë. Shumë e rëndësishme ta kuptojnë sot, nesër vonë. Nipërit dhe mbesat nuk do të gëzojnë dot gjyshërit. Nëse duan të gëzojnë nipërit dhe mbesat atëherë të respektojnë këshillat. Kam të njëjtat informacione dhe në Itali, nuk i besojnë atyre që shohin në TV.
Nuk është lojë, është luftë e vërtetë. Pandemi e cila ka shumë të panjohura. Askush nuk e kupton dot. Ka shumë të panjohura, kudo në Europë dhe në botë është vetëm fillimi. Kur më thanë që doli rasti i fundit në Kinë nga spitali thashë duhet kohë që të shihet. Unë them në 4 muaj do të kalojë.
Ne ende nuk e dimë çdo të ndodhë përtej kësaj pandemie. Ky virus mund të rikthehet prapë pas një viti apo pas dy vitesh me ndryshime, me mutacione. Ende nuk kemi asnjë vaksinë apo mjekim antiviral.
Sa kohë nuk kemi këto jemi para të panjohurave. Vaksina dhe medikamenti, e vetmja armë që kemi është kujdesi. Kujdesi është më i rëndësishmi. E para nuk sëmuren ata, e dyta nuk sëmuren të tjerët, e treta ka më pak numra të atyre që na vijnë në spital.
Shtimi i rasteve në Itali tejkalon çdo masë, kapacitet të mundshëm mjekësor. Ky eklipson mjekësinë dhe ekonominë”, pohoi mjeku Pipero.
