Mjeku infeksionist, Tritan Kalo thotë se Shqipëria ndodhet në tehun e thikës të ekzistencës shëndetësor, ekonomike dhe politike.
Kalo bën thirrje që të mos shpërndahen vetëm informacione terrorizuese dhe që politika të mos merret vetëm me mbushjen e xhepave.
Më tej, Kalo bën një përmbledhje të problemeve zinxhir që ka shkaktuar pandemia, si vështirësitë ekonomike për shkak të humbjes së vendit të punës, ndërprerje të shërbimeve për ata persona që kanë nevojë për trajtime shëndetësore, apo për ndërprerjen e mësimit.
“Kryefjala e përpjekjeve tona dhe atyre mbarëbotërore është ‘Përpjekja’ në përballjen me ‘flamën e shkaktuar prej infeksionit nga Sars-Cov2/Covid-19’. Kjo flamë mbarëbotërore, jo vetëm po ‘zbraz’ jetët njerëzore nga ekzistenca e tyre fizike, por që po zbraz edhe mendjet tona nga mënyrë normale e të arsyetuarit dhe të komanduarit të veprimeve tona”.
“Ju na mbytët nga ekranet televizive, nga faqet e shtypit të shkruar apo të rrjeteve sociale vetëm me informacione terrorizuese për “qenërinë” tonë politike që mezi presin të shqyejnë njëri-tjetrin jo për interesat tona dhe të mëmëdheut tonë, por vetëm e vetëm për të shqyer xhepat e tyre të pangishëm në këto 30 vite demon-kraci me para a pasuri.
Boll më!!!….Shqipëria e këndej dhe andej Drinit gjendet në tehun e thikës të ekzistencës shëndetësore, ekonomike dhe politike mbarëkombëtare. Nuk e kemi luksin të merremi me “panairin e kotësive” tuaja klasë/kastë/glasë politike e tranzicionit të pafundmë të demon-kracisë “Made in albania”, shkruan Kalo në rrjetin social, Facebook.
