Me ardhjen e dimrit, termometri në disa vende të Shqipërisë ka zbritur nën zero. Kjo ka ndodhur edhe në qytetin e Kukësit, ku temperaturat e ulëta kanë sjellë praninë e mjegullës në rrugët e këtij qyteti.
Mëngjesi i të mërkurës e ka gjetur Kukësin të mbuluar nga mjegulla, dhe kjo ka sjellë vështirësi në qarkullimin e automjeteve dhe këmbësorëve për shkak të pamjes së kufizuar.
Vështirësia më e madhe për të qarkulluar paraqitet në Rrugën e Kombit, pasi mjegulla është më e dendur dhe fluksi i qarkullimit të automjeteve është më i lartë, për shkak të ardhjes të emigrantëve kosovarë për festat e fundvitit.
Policia e Kukësit ju bën thirrje drejtuesve të automjeteve të lëvizin me kujdes, sidomos në segmentin rrugor Fushë Dukagjin–Tuneli i Kalimashit, i cili është pothuajse i pakalueshëm për shkak të dendësisë së mjegullës.
