Presidenti i Serbisë, Aleksander Vuçiç ka paralajmëruar se do të marrë masa kundër veprimeve në Prishtinë.
Këtë deklaratë, Vuçiç e bëri gjatë një takimi me numrin tre të Departamentit të Shtetit Amerikan, David Hale, me të cilin ka biseduar për vazhdimin e dialogut dhe heqjen e taksës.
Sipas presidentit serb, masa do të merret në një periudhë të shkurtër kohore, ndërsa u ankua edhe mbi platformën e miratuar dje në Kuvendin e Kosovës, të cilën e cilësoi si një platformë që nuk lë vend për negociata dhe është kundër vazhdimit të dialogut.
“E kam paralajmëruar prej kohësh Mogherinin dhe ekipin e saj se miratimi i asaj platforme nuk lë vend për kompromis, dhe për këtë arsye ajo si e tillë është kundër dialogut, sidomos kur ka refuzim kokëfortë të Prishtinës për të shfuqizuar taksën ndaj produkteve serbe që është e paarsyeshme dhe e dëmshme”– ka thënë Vuçiç shkruan B92.
