Bizneset janë në krizë, e shumë familje kanë ngelur pa punë. Situata nga koronavirusi ka dhënë efektet e veta jo vetëm në ekonomi, ndërsa ende nuk dihet konkretisht sa do të zgjasë kjo situatë. Qytetarët janë të izoluar, e ndërsa kërkesa që parashtrohet mësë shumti është se kur do të rikthehen në vendet e punës.
Ministrja e Financave dhe Ekonomisë, Anila Denaj, parashikon se në fund të muajit maj mund të kemi hapje të të gjitha bizneseve. Ajo deklaroi gjatë një interviste për ‘Ilva Now’ se fillimisht do të merret vendimi për hapje të pjesshme për disa kategori. Për të arritur që në fund të majit, të gjitha bizneset të jenë aktive.
“Hapja e bizneseve është një diskutim konkret. Unë besoj se brenda muajit prill do të ketë biznese të hapura. E rëndësishme është për të parë se si ecën dhe këtë javë situata me pjesën e infeksioneve në të gjithë rajonet e Shqipërisë. Hapja do të fillojë në mënyrë të përshkallëzuar. Ne besojmë se nëse situata e përhapjes së virusit do të jetë e kufizuar siç është në rastin konkret, do të ketë shumë më tepër probabilitet që hap pas hapi. Deri në fund të majit të kemi një shtrirje për të gjitha bizneset për të funksionuar”, tha më tej ministrja Denaj. (Në minutën e 28)
