Ndonëse Ministria e Shëndetësisë i dha leje për zhvillimin e mbledhjeve, pasi situata në Vlorë paraqitet e qëndrueshme sa i takon pandemisë, Dritan Leli vijon përplasjen me Këshillin Bashkiak. Kryebashkiaku i Vlorës, Dritan Leli, sot i ka kujtuar edhe njëherë anëtarëve të Këshillit, se masat anti-Covid janë ende në fuqi dhe mbledhjet do të vijojnë të zhvillohen online në platformën “Zoom”.
“Duke qenë se në datën 24.06.2021 është mbledhja e radhës e Këshillit të Bashkisë online në platformën “Zoom”, në këtë mbledhje t’i bashkohet rendit të ditës edhe rendi i ditës së mbledhjes jashtë radhe të datës 22.06.2021.
Nëse ju e vlerësoni se mbledhja jashtë radhe e kërkuar nga ana juaj sipas rendit të ditës të parashikuar të zhvillohet e veçantë në datën 22.06.2021 në sallën e teatrit ‘Petro Marko’ kjo nuk mund të ndodhë, dhe nuk mund të zhvillohet veçse online pasi janë në fuqi masat e parashikuara nga grupi i ekspertëve për parandalimin e Covid-19.
Ju kujtojmë se bazuar në masat anti Covid të përcaktuara nga Komisioni i Ekspertëve, zhvillimi i takimeve në ambiente të mbyllura do të ndryshojë pas datës 01.07.2021”, tha Leli.
Ministria e Shëndetësisë: Nuk cënohet aktiviteti
Ministria e Shëndetësisë i ka dhënë “dritën jeshile” zhvillimit të mbledhjeve të Këshillit Bashkiak të Vlorës, në ambientet e teatrit “Petro Marko”. Sipas këtij institucioni, puna e Këshillit Bashkiak mund të vijojë, duke shtuar se dhe situata epidemiologjike në Vlorë është e qëndrueshme.
“Përsa i përket Urdhërit të Ministres së Shëndetësisë ‘Për ndalimin e grumbullimeve në vende të mbyllura apo te hapura’ qëllimi ka qenë ndalimi i grumbullimeve të posaçme, që sikundër përmendet në urdhër lidhet me tubimet, konferencat, mbledhjet partiake, ceremonitë festive etj.
Ku rreziku i trasmetimit të virusit është shumë i lartë. Për sa më sipër, ky urdhër nuk cënon aktivitetin e Këshillit Bashkiak, pasi zhvillimi i mbledhjeve është vijimësi e punës së Këshillit Bashkiak, një praktikë që përdoret edhe nga institucione të tjera, që punën e tyre e mbështesin mbi organe kolegjiale.
Sot Vlora paraqet një situatë epidemiologjike të mirë, pa asnjë rast Covid. Sigurisht, këto mbledhje duhet të zhvillohen në përputhje me protokollet anti-Covid të miratuara si respektimi i distances, mbajtja e maskes, kushtet higjeno-sanitare etj”, thuhet në përgjigjen e Rakacollit.
