Ministria e Shëndetësisë ka publikuar urdhrin e dhënë më herët nga kryeministri Rama, në lidhje me kufizimin e lëvizjes së qytetarëve.
Në urdhër specifikohet edhe fasha e re e orareve që të paktën deri të hënën, nuk do jetë ashtu si ka qenë gjatë ditëve të fundit: 6:00 deri në 10:00 paradite dhe 16:00 deri në 18:00 pasdite.
Sipas vendimit të ri, pas orës 13:00 të ditës së nesërme do të ndalohet lëvizja e këmbësorëve, por dhe automjeteve, deri në orën 05:00 të mëngjesit të së hënës.
Mësohet se të vetmit që do të jenë në rrugë jashtë këtyre fashave të orarit, do jenë ushtria, policia, njësitë kritike të shërbimit shtetëror si dhe kompanitë mediatike.
Kujtojmë se masat për lëvizjet e qytetarëve janë ndërruar shumë herë ditët e fundit. Këto masa janë marrë në kuadër të luftës për frenimin e përhapjes së koronavirusit në vend.
Deri më tani në Shqipëri janë konfirmuar 70 raste me koronavirus, teksa 2 nga këta pacientë kanë humbur jetën.
