Dje, shefi i NATO-s Jens Stoltenberg njoftoi se Turqia dhe Greqia ranë dakord të hyjnë në bisedime teknike, për të ulur rrezikun e incidenteve në Mesdheun Lindor. Por Greqia mohoi më vonë se kishte rënë dakord të zhvillonte bisedime me Turqinë, të ndërmjetësuara nga NATO -ja, për të ulur tensionet mbi kufijtë detarë dhe të drejtat e kërkimit të gazit dhe naftës në rajon.
“Informacioni i botuar që pretendon se Greqia dhe Turqia kanë rënë dakord të mbajnë të ashtuquajturat ‘bisedime teknike’ mbi uljen e tensioneve në Mesdheun Lindor, nuk kanë të bëjnë me realitetin”, tha Ministria e Jashtme e Greqisë.
Në lidhje me këtë çështje, një kundërpërgjigje ka ardhur nga Ministri i Jashtëm i Turqisë, Mevlüt Çavuşoğlu. Ky i fundit deklaroi se homologu i tij grek, mohoi të pranonte propozimin e NATO-s për një takim të pakushtëzuar mbi tensionet në Mesdheun Lindor.
“Vlen të përmendet se Greqia gënjeu për Sekretarin e Përgjithshëm të NATO-s (Jens Stoltenberg). Ata (Athina) fillimisht ranë dakord, më pas thanë se nuk u pajtuan. Në fakt është Greqia ajo që gënjen dhe jo Sekretari i Përgjithshëm”, tha Mevlüt Çavuşoğlu në një konferencë për media në Ankara.
“Greqia edhe njëherë tregoi se nuk është pro dialogut”, tha Çavuşoğlu.
Ai kritikoi Francën për nxitjen e Greqisë kundër Turqisë, dhe i bëri thirrje Francës që t’i japë fund “akteve të saj histerike” pasi “e bën veten të duket qesharake”.
