Ish-deputeti i LSI-së, Endrit Brahimllari, e ka cilësuar takimin e sotëm mes kryeministrit Rama dhe liderëve të Ballkanit, si një thikë pas shpine për Kosovën. I ftuar në rubrikën “Opinion” në News24, Brahimllari tha se Rama po tenton t’i bëjë presion BE-së me mini-shengenin.
“Ajo çfarë bëri Rama sot ishte ‘thikë pas shpine’ për Kosovën. Vizitën e parë si kryeministër e bëri në Beograd, Rama i kërkoi Vuçiçit njohjen e Kosovës. Sot nuk bëhet fjalë për njohje, por për një ‘Mini-Shengen të përbashkët’. Kjo është një politikë kundër interesave kombëtare.
Deklarata sot ndaj BE-së janë të rënda, ku pasi dështoi me negociatat po tenton t’i bëjë presion BE-së me Minishengen.
Edi Rama i ka vendosur taksë Kosovës me Rrugën e Kombit. Ata që e pësojnë janë bizneset e Kosovës. Kur presim lehtësim, ai vendos barrierë. Ai do ta orientojë Shqipërinë drejt një politike që nuk është pjesë e BE-së. Është interesi personal i tij. Aspirata jonë është BE-ja”, tha ai.
Sipas tij, kreu i qeverisë me anë të ushtarëve të tij, kërkon që të kapë Gjykatën Kushtetuese. Ai shton se Rama ka frikë nga ky institucion pasi ai kërkon të fusë në parlament ligje që bien ndesh me Kushtetutën.
“Edi Rama ka thelluar krizën në vend. Rama nuk do Gjykatën Kushtetuese. Kryeministri provokon presidentin për të shkelur kushtetutën. Ne nuk themi se nuk njohim KED, por persona të caktuar që fusin në krizë vendin. Por, edhe ky person është në drejtim të Edi Ramës. Rama me ushtarë të tij kërkon të kapë Gjykatën Kushtetuese, sepse Edi Rama e ka tmerr ngritjen e një Gjykate Kushtetuese të pavarur. Rama kërkon të fusë në parlament ligje që bien ndesh me Kushtetutën, ku mbajmë mend edhe çuarje të ligjit të teatrit për shembull. Edi Rama bashkë me parterët e tij duhet të respektojë Kushtetutën”, deklaroi ish-deputeti.
