Ish-kreu i skuadrës së Formula 1, Ferrari, Jean Todt, ka dhënë disa detaje lidhur me gjendjen e pilotit legjendar, Michael Schumacher.
74-vjeçari tha se Schumacher është ende duke luftuar për shërimin, pothuajse shtatë vjet pas aksidentit të tmerrshëm me ski që e la atë me lëndime në tru. Francezi Todt ka qenë në krye të skuadrës gjatë fitoreve të pesë titujve të Schumacher. Todt është nga vizitorët e paktë të ish-pilotit 51-vjeçar që po kurohet në Zvicër.
“E takova Michael javën që shkoi, ai është duke luftuar. Ne e dimë që ai kaloi një aksident të tmerrshëm e të pafat me ski, por ka pranë gruan e tij të mrekullueshme, fëmijët dhe stafin mjekësor, prandaj i urojmë më të mirën”, tha Todt për agjencinë PA.
Ikona e Ferrarit është jashtë gjendjes afatgjatë të komës, por kirurgu Nicola Acciari thotë se është një njeri i ndryshuar nga ai që miliona njerëz e mbajnë mend.
“Ne duhet të imagjinojmë një person të ndryshuar nga ai që shihnim në pistë, një njeri me një strukturë të ndryshuar dhe përkeqësuar organike, muskulore e skeletore. Kjo si rezultat i traumës cerebrale që kaloi”, tha ai.
