Areti Beruka, e cila është specialiste sektori në ISHP, ka sqaruar deklaratën e saj e cila u bë virale. Në studion e lajmeve në “Fax News”, ajo tha se fraza e saj se po priste rastin e parë me koronavirus, është përdorur politikisht në mënyrë të turpshme.
“Është e turpshme që të bësh politikë, dhe të nxjerrësh një frazë jashtë kontekstit. Ia kam dhënë përgjigjen gazetares se pse e mendoja një gjë të tillë. Vetëm për shkak të skepticizmit të njerëzve ndaj rezultateve të testeve që ne kishim nxjerrë. Dua t’iu bëj me dije se personeli mjekësor është i mirëorganizuar për përballimin e këtyre rasteve”, tha Beruka.
Beruka tha se mjekët po ndjekin hap pas hapi të gjitha protokollet e OBSH-së. “Mjekët po ndjekin të gjitha protokollet e OBSH-së, kur del nga persona që nuk flasin shqip janë më të besueshme për njerëzit tanë. Dua të bëj apel përmes televizionit tuaj që të ulet paniku, nga 65 rastet që ne kemi testuar derimë tani, vetëm 2 kanë qenë me COVID. Nuk kemi fshehur asnjë rast. Kemi 14 raste në testim të cilët kanë qenë persona kontakti, jemi në gjurmim të kontakteve të tjera.
Janë 14 raste në proces, që kanë pasur kontakte, pasi të dalin rezultatet mund të ketë raste të tjera, këtë nuk dimë ta themi. Dua të sqaroj skepticizmin, që njerëzit kanë pasur ndaj laboratorit, shprehje të tilla se laboratorët nuk kanë qenë të specifikuar, përfshirë dhe intelektualë, që nuk ka asgjë të vërtetë.
Specialistët e mirëtrajnuar, jo të infektivit, pasi ata janë profesorët tanë, përhapja përmes spërklave është e madhe, nuk ndodh përmes ajrit. Duhet përdorur maska vetëm nga ana personave që ka dyshime se janë të prekur”, u shpreh specialistja e ISHP-së.
