Në një konferencë të jashtëzakonshme, presidenti Meta ka dhënë argumentet për anulimin e zgjedhjeve, parashikuar në datën 30 qershor. Ai tha se sipas Kushtetutës, presidenti cakton datën e zgjedhjeve, duke bërë njëkohësisht edhe një bilanc lidhur me zhvillimet e jetës politike, e cila ka pësuar një krizë përfaqësimi. “Jam sot për të shpjeguar para jush dhe gjithë qytetarëve, arsyet për shfuqizimin e dekretit për zgjedhjet e 30 qershorit. Në zbatim të nenit 92, Presidenti i Republikës është organi i vetëm Kushtetues, që ka për kompetencë caktimin e datës së zgjedhjeve si dhe për zhvillimin e referendumeve. Konkretisht në këtë dispozitë, Kushtetuta përcakton datën e zgjedhjeve. Pa pasur një datë të caktuar nga Presidenti i Republikës, zgjedhjet e përgjithshme apo vendore nuk mund të zhvillohen”, deklaroi Meta.
Meta nënvizoi edhe një herë tjetër se ka bërë të gjitha përpjekjet, që palët të gjenin gjuhën e përbashkët, e të bashkëpunonin. Por duke parë gjendjen e agravuar mes tyre, presidenti tha se pavarësisht përpjekjes, ka konstatuar thellimin e krizës. Ai rikujtoi ditën kur është vendosur 30 qershori si data për zgjedhje, e cila është dekretuar në kushtet e një klime normale demokratike. “Presidenti ka caktuar datën 30 qershor si ditën e zgjedhjeve, është dekretuar në muajin nëntor në kushtet e një klime normale demokratike”, tha ai.
Kreu i shtetit e konsideroi si rrezik serioz, ndërsa në zgjedhje kandidohet me një kandidat. “Dita e realizimit të zgjedhjeve duhet të jetë një ditë bashkimi dhe jo përçarje për popullin. Është dekretuar data në kushtet e një klime normale politike në vend. Presidenti ka ndjekur në vijimësi masat administrative për realizimin e këtij procesi, por rezulton se në skadim të afatit të regjistrimit të partive politike, ato të opozitës nuk janë regjistruar, pasi sipas tyre nuk mund të garantohen standardet për zgjedhje të lira. Ky vendim i opozitës, pason vendimin e saj për djegien e mandateve. Nga ana tjetër, Shqipëria po kalon një krizë Kushtetuese.
E gjithë kjo gjendje është shqetësuese dhe rrezikon stabilitetin e vendit. Si president kam bërë të gjitha përpjekjet, dhe kam bërë thirrje mes palëve që të gjejnë zgjidhje dhe të kalojnë krizën, por përpos thirrjeve sërish me keqardhje konstatoj se palët politike reflektojnë thellim të ndasive mes tyre.
Qeveria synon të shkojë e vetme në zgjedhje, pa marrë asnjë hap për zgjidhen e krizës dhe dialog, nga ana tjetër edhe opozita shprehet se do të pamundësoje zgjedhjet, në vlerësim të situatës dhe gjuhës së urrejtjes… eksiton rreziku që vendi të shkojë drejt përshkallëzimit të pasojave të pakontrollueshme. E konsideroj këtë moment si moment serioz për paqen në vend”, u shpreh Meta.
