Në një konferencë të jashtëzakonshme për shtyp, duke cituar Kushtetutën, Meta tha se Presidenti i Republikës është organi i vetëm Kushtetues që ka për kompetencë caktimin e datës së zgjedhjeve, dhe për zhvillimin e referendumeve. Ai u shpreh se zgjedhjet janë moment bashkimi për qytetarët shqiptar, dhe kurrsesi nuk mund të jetë ditë ndarëse.
Presidenti Meta tha se dekreti i tij për të shfuqizuar dekretin e zgjedhjeve, nënkupton se anulimi i 30 qershorit, do të thotë shtyrje e tyre përtej afatit të caktuar zgjedhor. Por kjo sipas tij, nuk paraqet pengesa Kushtetuese.
Meta deklaroi po kështu se data e ardhshme e zgjedhjeve do të caktohet brenda një afati të arsyeshëm, por kjo datë do të jetë e dakordësuar politikisht. “Të krijohet hapësirë kohe e nevojshme që palët të diskutojnë për të gjetur rrugën e krizës”, tha ai.