Presidenti i zgjedhur, Ilir Meta, në mitingun që LSI-ja mbajti në Pogradec, hodhi akuza të forta ndaj kryeministrit Edi Rama. Meta tha se Rama e shiti bashkinë e Pogradecit dhe të Lezhës te Partia Demokratike. Meta e bën përgjegjës drejtpërdrejtë Ramën lidhur me humbjen e LSI-së në këto dy bashki, në zgjedhjet lokale të vitit 2015. Meta gjithashtu e akuzoi Ramën se do që ta kthejë Shqipërinë në një vend grumbullimi të mbeturinave të Evropës të lidhur me mafien italiane dhe mafiet e tjera.
“Pogradeci ka hak për të marrë për ata që e shiten Bashkinë e Pogradecit. Rama bëri thirrje për bashkimin e të majtëve por e shitën bashkinë e Pogradecit dhe të Lezhës tek PD-ja. LSI i qëndroi korrekte kudo PS-së në të gjithë Shqipërinë. Rama e ka braktisur Pogradecin”, tha Meta.
Gjithashtu Meta tha se “Duhet ndryshim që mos të shohim duar të shëmtuara që shëmtojnë Korçën me kulla të shëmtuara. Nuk e ka fajin Edmond Panariti që Rama nuk i jepte asnjë fond për bujqësinë. Rama nuk bëri asnjë investim për bujqësinë. LSI ka paraqitur në parlament kërkesën që koncesionet për të mbrojtur koncesionet që lidhen me pasuritë natyrore të vendit të miratohen në parlament.”
Ndër të tjera Meta tha se “Ramës i ka mbetur hatri me LSI-në sepse ne jemi kundër që Shqipëria të kthehet në vendgrumbullimin e mbeturinave të Evropës të lidhur me mafien italiane dhe mafiet e tjera.”
