Presidenti Meta është takuar me ish-të dërguarin special të SHBA-së për negociatat e paqes mes Kosovës dhe Serbisë, Richard Grenell. Kreu i Shtetit njoftonte me anë të rrjeteve sociale se është kënaqësi ta ketë ish-ambasadorin Grenell në Shqipëri dhe në zyrën e tij. “Është gjithmonë kënaqësi të kemi Richard Grenell në Shqipëri dhe në zyrën time. Angazhimi i tij në mbështetje të forcimit të mëtejshëm të marrëdhënieve dhe bashkëpunimit mes Shqipërisë dhe Shteteve të Bashkuara, vlerësohet shumë”, shkruante Meta.
Duket se ish-kryeministri Sali Berisha dhe presidenti Ilir Meta, kanë varur shpresat tek Richard Grenell dhe rikthimi i Donald Trump në krye të Shtëpisë së Bardhë, për t’i shpëtuar ofensivës amerikane. Berisha po hedh hapin e radhës, që të heqë “non gratën”. Në lojë është futur diplomati Richard Grenell, për të fituar simpatinë e ish-presidentit Donald Trump. Ky i fundit lakohet se mund të garojë në zgjedhjet presidenciale të vitit 2024 në SHBA, dhe sondazhet e nxjerrin si fitues.
Ish i dërguari i presidentit Trump ka dhënë një intervistë për Radion e Qendrës Amerikane për Ligj dhe Drejtësi, ndërsa ndodhet në Shqipëri. Grenell merr në mbrojtje Berishën, ndërsa shprehet se DASH e ka shpallur “non grata” pa prova.
“Mendoj se ky është një skandal i madh, sepse sekretari ynë i shtetit, Antony Blinken, ka tërhequr levat e pushtetit në Departamentin e Shtetit, për t’i ndaluar ish-presidentit, liderit të partisë shqiptare, një parti konservatore, z. Berisha. Atij i ndalohet të hyjë në Shtetet e Bashkuara. Tani, mund ta them këtë pa mëdyshje, nuk kam parë asnjë provë që tregon se atij duhet t’i ndalohet udhëtimi në Shtetet e Bashkuara, që është një sanksion shumë i madh. Dhe nëse ky informacion ekziston, nëse është i ri, atëherë Sekretari i Shtetit duhet t’i përgjigjet kongresmenit Lee Zeldin nga kërkesa e Nju Jorkut për të parë informacionin”, deklaroi Grenell.
