Presidenti Ilir Meta ka pritur mbrëmjen e sotme në një takim ministrin e Shtetit për Rindërtimin, Arben Ahmetaj.
Përmes një postimi në Facebook, Meta bën me dije se Ahmetaj e njohu me masat e marra nga qeveria, për përballimin e situatës së krijuar nga përhapja e koronavirusit.
Kreu i shtetit njofton se ka diskutuar me të, edhe mbi mundësinë e mbledhjes të Këshillit të Sigurisë Kombëtare.
Postimi i plotë:
Sot në mbrëmje prita me kërkesën time, ministrin e Shtetit për Rindërtimin, z.Arben Ahmetaj, të ngarkuar nga Qeveria edhe për koordinimin dhe drejtimin e punës, ndërmjet ministrive dhe institucioneve, për hartimin e planit të përballimit të situatës ekonomike të shkaktuar nga pandemia globale ? #COVID19.
U njoha nga ministri Ahmetaj për masat e marra nga Qeveria për përballimin e kësaj situate kritike, si dhe diskutuam mbi mundësinë e mbledhjes në një kohë sa më të afërt të Këshillit të Sigurisë Kombëtare.
Bashkëpunimi, gjithëpërfshirja, humanizmi dhe solidariteti mbarëkombëtar do të na japë të gjithëve fuqinë e duhur pozitive për ta fituar këtë sfidë.
