Pas protestës, një mesazh i koduar ka ardhur nga zv.ministri i Mbrojtjes Petro Koçi për presidentin Meta. Kreu i Shtetit firmosi dje dekretin kundër ligjit për betimin e gjyqtarëve të rinj kushtetues.
Meta kërcënoi qeverinë se do të shpërndajë Parlamentin, nëse nuk ka një reflektim nga qeveria. Lidhur me këtë zhvillim, Petro Koçi shkruan në Facebook: “Shqiptarët i thanë po Kushtetutës, jo Metës!”.
Sikundër ishte njoftuar edhe më herët, Meta zbriti dje në shesh, duke protestuar në mbrojtje të Kushtetutës dhe kundër atij që e quan “grusht shteti”. Tubimi nisi rreth orës 17:00, në bulevardin “Dëshmorët e Kombit”, ndërkohë që presidenti Meta ka dalë nga Presidenca me dy gishta lart, dhe pak hapa më tutje u përul para njerëzve teksa ka bërë edhe shqiponjën me duar.
Meta shoqërohej nga persona publikë që mbajtën fjalën e tyre gjatë tubimit, ndërsa ra në sy edhe prania e liderëve të opozitës, duke filluar nga kryedemokrati Basha, deri tek ish-kryeministri Sali Berisha apo kryetarja e LSI, Monika Kryemadhi.
