Banka e gjakut në Shqipëri vazhdon të ketë mungesa të theksuara, ku të sëmurët, veçanërisht talasemikët përballen me vështirësi. Shpesh shumë prej tyre as nuk e marrin sasinë e nevojshme të gjakut.
Në kuadër të “Aleancës për Dhurimin e Gjakut”, Presidenti Ilir Meta vizitoi ambientet e “Fundjavë Ndryshe”. Ku dhjetëra të rinj u mblodhën për të dhuruar gjak. I shoqëruar nga drejtuesi i fondacionit, Arbër Hajdari, ata bënë thirrje për një kujdes më të veçantë për këtë fenomen. I cili po rrezikon shumë vendin tonë.
Në një intervistë për Tirana Today, kreu i shtetit theksoi nevojën e shtimit të aktiviteteve të ngjashme, në mënyrë që njerëzit të ndërgjegjësohen e solidarizohen. Por, qeveria duhet të ketë një angazhim më të madh për të marr hapa konkretë mbi këto probleme.
”Këto janë angazhime të jashtëzakonshme të cilat duhen përkrahur e shtuar. Kjo pasi shoqëria ka nevojë të shkundet dhe të ndahet nga një lloj individualizmi, egoizmi. Si edhe mungesë solidariteti apo vëmendje ndaj problemeve dhe shqetësimeve sociale të shtresave të ndryshme në vështirësi. Ndaj në këtë drejtim iniciativat “Fundjavë Ndryshe” janë një shembull tepër pozitiv për shoqërinë. Aq më tepër që është një iniciativë tërësisht e të rinjve. Vetëm në këtë mënyrë do ta kurojmë shoqërinë tonë nga indiferenca dhe nga mos vëmendja e shumë plagëve sociale.
Por, sigurisht që këto nuk mjaftojnë. Në radhë të parë duhen angazhime të fuqishme, të programuara të shtetit, të qeverisë, të pushtetit vendor. Sepse janë angazhime kushtetuese, të cilat kanë të bëjnë me respektimin e të drejtave të njeriut. Pasi varfëria ekstreme i cënon këto të drejta.”
Presidenti Meta tha se qeveria duhet të ketë një bashkëpunim më të mirë me shoqërinë civile. Në mënyrë që të krijohen sa më shumë iniciativa të reja.
“Aleanca për Dhurimin e Gjakut po funksionon mjaft mirë dhe është një aleancë afatgjatë. Por, ka dhe mungesa për të cilat duhen iniciativa të reja dhe një koordinim më i mirë i qeverisë me shoqërinë civile.
Ne jemi në një proces dialogu ku janë të përfshirë edhe drejtuesit e qeverisë, përveç përfaqësues të Kuvendit, institucioneve të tjera. Dhe unë besoj që kjo atmosferë përfshirëse do të ndikojë që të gjithë të jenë më të ndjeshëm dhe më bashkëpunues për këtë çështje.” TIRANA TODAY
