Gjatë Konferencës për Shtyp, Presidenti Ilir Meta ka komentuar edhe deklaratat mes kryeministrit Edi Rama dhe Ramush Haradinajt sa i përket heqjes së taksës ndaj mallrave serbe nga Albin Kurti.
Meta paralajmëroi Ramën që mos ta provokojë më Ramush Haradinajn.
“Ndoqa edhe lojërat e tij që gjoja mbronte Albin Kurtin kundër Haradinajt. E ka kaluar me kohë vijën e kuqe, e ka tepruar shumë. Po e provokon më shumë seç duhet Haradinajn.
Mos e provokojë më Ramush Haradinajn. Ai mund të ketë 500 probleme, por Ramush Haradinaj për gjithë shqiptarët dhe në gjithë botën është hero i gjallë ndërsa gruaja e bilalit për gjithë shqiptarët është turpi i turpit.
Dhe të mos merret më me familjen dhe figurën e Ramush Haradinajt. Se Haradinaj në oborrin e shtëpisë së vet ka 40 varre. Dhe çdo ditë kur del në mëngjes i thotë mirëmëngjes vëllezërve dhe kushërinjve që dhanë jetën për Kosovën.
Rama mund ta marrë përgjigjen nga Shqipëria, s’mund të pranojmë lojëra të tilla përçarëse. Udhëheqësit e Kosovës kanë përgjegjësitë e tyre. Ne kemi për detyrë t’i mbështesim. S’kemi për detyrë t’i përçajmë për llogari të armiqve historikë të kombit tonë.
Sa të ketë Shqipëri dhe shqiptarë, Esat Pashë Tradhëtari, njeriu më i pasur në Shqipëri 100 vite më parë që merrte pagesa të parmuajshme nga armiqtë e Shqipërisë nuk e ka një varr këtu, edhe nuk do ta ketë sa të ketë Shqipëri”, tha Meta.
