Lidhur me krizën politike që ka kapluar vendin, kreu i shtetit deklaron se për të shmangur pasojat sipas tij kushtetuese, institucionale dhe politike, është i gatshëm të rishikojë dekretin për datën e zgjedhjeve vendore të 30 qershorit. Në kushtet kur opozita nuk do të marrë pjesë në zgjedhje, Meta shprehet se në mbështetje të nenit 92 të Kushtetutës, është i gatshëm të dekretojë një tjetër datë zgjedhore. Ndër të tjera, Meta nënvizon se është i gatshëm edhe të dorëhiqet si President i Republikës, në funksion të zgjidhjes së krizës, duke propozuar zgjedhjen e kreut të shtetit nga populli.
“Ashtu siç deklarova me përgjegjësi më 20 mars nga Pogradeci, mbetem i gatshëm që për një zgjidhje që i shërben interesit më të mirë, stabilitetit dhe demokracisë së vendit, të vendos në dispozicion edhe mandatin tim si President i Republikës, nëse palët e gjykojnë edhe këtë element si të rëndësishëm për një zgjidhje gjithëpërfshirëse, që do t’u jepte qytetarëve shqiptarë të drejtën për të zgjedhur edhe Presidentin me votën e tyre të lirë.
Askush nuk duhet të ketë frikë nga vota e lirë e qytetarëve shqiptarë, që qëndron në themel të bashkëjetesës demokratike, pa garantimin e së cilës nuk mund t’i çelim as negociatat për anëtarësim në Bashkimin Evropian”, bën me dije presidenti Meta.
Deklarata zyrtare e Metës vjen në kulmin e debatit të madh politik në vend, teksa opozita kërkon largimin e Ramës, dhe që të mos zhvillohen zgjedhjet më 30 qershor. Nga ana tjetër, kryeministri deklaron se ai nuk ka asnjë tagër kushtetues ta lëvizë këtë datë. Sot ishte hera e parë që Meta deklaron se është gati ta rishohë dekretin për datën e zgjedhjeve, pasi ia jep të drejtën edhe Kushtetuta.
Presidenti Meta: I gatshëm të ndryshoj datën e zgjedhjeve vendore
