Presidenti i Republikës, Ilir Meta ka mohuar faktin se mes tij dhe kryeministrit Edi Rama mund të ketë një marrëveshje politike.
I ftuar në emisionin ”Çim Peka Live”, në ”Syri.net”, Meta u shpreh se presidenti nuk mund të bëjë marrëveshje me një person që vë në dyshim kufijtë e Shqipërisë dhe shtetin e Kosovës.
Ndër të tjera, ai tha se me Ramën mund të jetë i detyruar vetëm të bashkëpunojë për ndonjë çështje të vogël në dobi të vendit.
“Nuk ekziston asnjë mundësi sot apo në të ardhmen që Ilir Meta të bëjë një bashkëpunim me Edi Ramën. Këtë regjistrojeni mirë dhe mbajeni shënim. Ilir Meta me një njeri që vë në dyshim kufijtë e Shqipërisë dhe ka vënë në diskutim shtetin e Kosovës, kurrë mos e mendoni të bëjë pakt politik. Unë mund të jem i detyruar të bashkëpunoj për shkak të situatës për diçka të vogël. Marrëveshje politike mes Ilir Metës dhe Edi Ramës në këtë botë nuk ka”, tha Meta.
