Kreu i Shtetit, Ilir Meta, ka thirrur në takim krerët e partive politike ditën e premte, për të caktuar datën e zgjedhjeve 2021.
Mësohet se në këtë takim, Meta ka thirrur edhe deputeten demokrate Rudina Hajdari.
Lajmin e ka përcjellë vetë Rudina, përmes një postimi në Instastory, ku kërkon ndihmë nga ndjekësit e saj se cila do të ishte sipas tyre, një datë e përshtatshme për zgjedhjet e ardhshme mes periudhës 15 prill -15 Maj.
Pak ditë nga hyrja në fuqi e ndryshimeve kushtetuese dhe e Kodit Zgjedhor, presidenti Ilir Meta ka nisur procedurat për caktimin e datës së zgjedhjeve parlamentare të vitit 2021. Meta i ka nisur një letër kreut të Grupit Parlamentar të Partisë Socialiste, Taulant Balla dhe Sekretarit të Përgjithshëm të Partisë Demokratike, Gazment Bardhi për të zhvilluar një takim në datë 4 shtator, ku në fokus do të jenë konsultimet për caktimin e datës së zgjedhjeve të ardhshme parlamentare.
Në letrën drejtuar kreut të grupit parlamentar socialist, Meta fton kreun e PS, Edi Rama, apo persona të tjerë të autorizuar prej tij, në një takim ditën e premte në orën 11:00 në institucionin e Presidencës. Ndërsa në letrën drejtuar Gazment Bardhit, Meta fton kreun e PD, Lulzim Basha apo persona të tjerë të autorizuar prej tij për t’u takuar në Presidencë po ditën e premte, por në orën 12:00.
