Kryetari i Partisë së Lirisë, Ilir Meta, ka pohuar se nuk ka asnjë fakt për hetimin e ngritur nga SPAK në lidhje me të. Në një intervistë për “News24”, ai paralajmëroi se nga shtatori do të ketë fakte të reja. Sipas tij, kemi të bëjmë me një regjim mafioz që mbështetet mbi falsifikime.
“Duhet ta keni të qartë, nuk ka asnjë fakt apo pseudofakt që nga SHBA-ja deri në Zimbabve dhe Zelandën e Re, për asnjë lloj shkelje të ligjit nga Meta apo LSI në kohën kur Meta ka qenë kryetar i kësaj force. Çështja është shumë e qartë. Kjo krijesë e partisë në drejtësi siç ka thënë vetë Rama që SPAK është krijesa jonë, dëshiron të prodhojë lajme në shërbim të Endri Fugës nuk është problemi im. Angazhimi ynë është që brenda shtatorit, mali i fakteve për Ramën, Agaçin do ta kalojë tavanin e lartë të SPAK-ut. Deri tani ka kaluar katin e parë. Mali i fakteve do të dalë mbi SPAK-un. Kemi një regjim mafioz që mbështetet mbi falsifikime”.
Kërkesa e SPAK-ut vjen në kuadër të hetimeve për skandalin për lobim në SHBA me 700,000 mijë USD të padeklaruara. Kallëzimin e ka depozituar në SPAK ish deputeti Halit Valteri. Sot kryeministri Rama refuzoi të komentonte hetimet e SPAK-ut për Ilir Metën. Gjatë konferencës për shtyp me kryeministrin e Luksemburgut, Rama u pyet nga gazetarët për hetimet, por ai zgjodhi të mos përgjigjej duke theksuar se çështje të politikës së brendshme nuk i diskuton kur pret miqtë nga jashtë.
