Nga dje qeveria mori masa të tjera shtesë për nxënësit, lidhur me shtimin e të infektuarve. Ministrja e Shëndetësisë, Ogerta Manastirliu, në një komunikimin me publikun për masat e marra për përballimin e epidemisë, tha se nga 1 dhjetori mësimi për nxënësit do të zhvillohet i alternuar, online dhe në klasë. Ajo u shpreh se një vendim i tillë ka ardhur me qëllim minimizimin e përhapjes së Covid 19, në një kohë që po qarkullon edhe virusi i stinës.
Ndër të tjera, ministrja shtoi se shkollat nuk kanë qenë vatër infeksioni, por kjo është një masë parandaluese. “Ne vendosëm që t’i rekomandojmë MASR që nga data 1 Dhjetor, të aplikojë skenarët që parashikojnë kryerjen e mësimit të alternuar, pra në formën tradicionale, me prani fizike duke e kombinuar dhe me mësimin ne distancë (online) bazuar në specifikat e sistemit arsimor dhe të dhënave lokale përkatëse në bashkëpunim me autoritetet shëndetësore”, deklaroi një ditë më parë Ministrja e Shëndetësisë.
Sipas këtij skenari, gjithçka varet nga kapaciteti i çdo shkolle, por në parim parashikohet zhvillimi i mësimit një javë në shkollë dhe një javë online.
SKENARI 2 I MIRATUAR
Shkolla me kapacitete të mjaftueshme
Në rastet kur bëhet fjalë për shkolla që e zhvillojnë mësimin në një turn dhe kanë kapacitete të mjaftueshme, atëherë mund të bëhet një kombinim i klasave, ku një grup do të bëjë mësim duke qenë prezent në klasë dhe grupi tjetër online. Për shembull, mësim duke qenë prezent mund të bëjnë klasat 1, 3, 5, 7 dhe 9, ndërkohë që klasat 2, 4, 6, 8 zhvillojnë mësimin online.
Shkolla me shumë nxënës dhe me kapacitete te limituara
Sipas skenarit nr.2, në rastin e këtyre shkollave, drejtoria duhet të bëjë një grafik të hyrjes dhe daljes së nxënësve prej saj, duke shmangur grumbullimet. Klasa ndahet në dy grupe dhe mësimi zhvillohet me fasha oraresh të ndryshme. Për shembull, grupi i parë bën mësim nga ora 08:00 deri në 11:00 dhe grupi tjetër nga ora 12:00 deri në 15:00. Javën tjetër, grupet shkëmbejnë orarin e mësimit. Mësimi në çdo rast zhvillohet 30 minuta.
Shkollat që bëjnë mësim me dy turne
Protokolli nr.2 parashikon se shkollat që kanë shumë nxënës dhe kapacitete të vogla, duhet që t’i ndajnë klasat në 4 grupe. Përcaktohet një orar hyrjeje dhe daljeje nga shkolla për secilin grup, me qëllim që të shmangen grumbullimet. Grupet shkëmbejnë oraret me njeri-tjetrin çdo javë.
