Ka përfunduar takimi midis kryeministrit Edi Rama dhe kancelares gjermane, Angela Merkel.
Takimi mes Merkel dhe Ramës ka zgjatur për rreth 90 minuta, ndërsa në qendër të bisedës ka qenë progresi i Shqipërisë dhe rekomandimi i KE për hapjen e negociatave.
“Ka një numër parakushtesh për fillimin e negociatave për anëtarësim. Në ditët në vijim do të krijojmë opinionin tonë përfundimtar, ndërsa do të diskutojmë edhe me kolegët tanë europianë. Vendimin mbi rekomandim in e KE-së për ju do ta marrim në qershor”, mësohet të ketë deklaruar Merkel.
Ajo vlerësoi se Shqipëria kishte kryer një sërë reformash, siç është vettingu i prokurorëve dhe gjykatësve.
“Sfondi është lufta kundër korrupsionit dhe krimit të organizuar. Ne do të formojmë opinionin tonë përfundimtar gjatë javëve të ardhshme nëse ka ende gjëra për të bërë, nëse ka progres të mjaftueshëm”, mësohet të ketë thënë Merkel.
Ndërkohë, Rama falenderoj Merkelin për mbështetjen e dhënë për rajonin, por në veçanti për Shqipërinë.
Ai u shpreh se Shqipëria e meriton hapjen e negociatave pas reformave të ndërmarra. Rama thotë më tej se feja e shqiptarëve është Europa.
“Falenderoj Merkel për mbështetjen e saj ndaj Ballkanit Perëndimor në rrugën e integrimit evropian dhe në këtë kontekst, Shqipërinë. Falë vizionit të tyre dhe fuqisë së integrimit, procesi i Berlinit e ka transformuar rajonin. Ne kemi bërë përparime të pabesueshme. Kur takuam në vitin 2014, folëm gjithashtu për të bërë një reformë themelore ligjore. Sot jam krenar të them këtu se Shqipëria ka kryer një reformë të thellë në fushën ligjore dhe gjyqësore, e cila është vlerësuar si e tillë nga Komisioni Evropian dhe si një model për të gjithë vende të tjera të Ballkanit Perëndimor.
Pas rekomandimit të KE, unë shpresoj të kem mbështetjen e Gjermanisë dhe kancelares në qershor. Është shumë e qartë për ne se ky nuk është fundi. Ky është fundi i një faze dhe hapja e një faze tjetër. Ka shumë reforma, shumë sfida dhe shumë sakrifica që na presin, kështu që ne meritojmë të bëhemi anëtar i Bashkimit Evropian. Unë kam ardhur këtu për të përcjellë kancelarit besimin tim se Shqipëria nuk duhet të humbasë kohë në pritje të hapjes së negociatave për anëtarësim për shkak se Shqipëria e meriton atë.
Shumica për Shqipërinë thotë se jemi myslimanë. Por ne jemi një vend, ku të krishterët dhe myslimanët bashkëjetojnë me njëri tjetrin. Nga veriu në jug i Shqipërisë, ata kanë të njëjtën fe. Kjo fe është Europa”, është shprehur Rama.
Para takimit në një konferencë për mediat, Merkel ka vlerësuar reformat e ndërmarra nga Shqipëria, ndërsa vendimi i Berlinit për negociatat do të jetë në javët në vazhdim.
Një ditë më parë Rama takoi në Tiranë presidentin e Këshillit Evropian, Donald Tusk, i cili u shpreh se është optimist për vendimmarrjen e qeverisë së vendeve anëtare të BE dhe Parlamentit Evropian në muajin qershor.
