Rusia dhe Gjermania janë duke biseduar për mundësinë e prodhimit të përbashkët të vaksinës kundër koronavirusit.
Në një bisedë telefonike, presidenti rus Vladimir Putin dhe kancelarja gjermane Angela Merkel diskutuan për çështjet në lidhje me bashkëpunimin në luftën kundër pandemisë së koronavirusit me theks mbi perspektivat e mundshme për prodhimin e përbashkët të vaksinave.
Ende nuk ka një marrëveshje konkrete, por Merkel dhe Putin u dakordësuan që të vazhdojnë kontaktet mbi çështjen midis ministrive të shëndetësisë të dy vendeve dhe agjencive të specializuara.
Të dy udhëheqësit diskutuan gjithashtu zgjidhjen e konfliktit midis Kievit dhe forcave separatiste pro-ruse në Ukrainën lindore, pasi situata ka mbetur e bllokuar që kur u nënshkruan marrëveshjet e paqes më 2015.
Rusia dhe Gjermania kohët e fundit kanë filluar vaksinimet masive për të frenuar përhapjen e koronavirusit. Gjermania po përdor vaksinën e zhvilluar nga Pfizer dhe BioNtech, ndërsa Rusia ka hedhur në qarkullim masiv vaksinën e saj Sputnik V.
