Kryetari i Partisë Republikane, Fatmir Mediu është shprehur se negociatat me Kryedemokratin Lulzim Basha po vazhdojnë dhe sipas tij mes tyre do të ketë një marrëveshje.
I pyetur në emisionin ‘Log’ nëse kjo është një marrëveshje “me të hedhur”, Mediu u shpreh se asgjë nuk e pengon atë të dal më vete, duke thënë se asnjë nga palët nuk ka se çfarë i “hedh” tjetrës.
“Po, do të bëhet marrëveshja, sikur është hera e parë që e bëjmë këtë punë në minutën e fundit. Nuk kanë çfarë të hedhin, se ja hedh vetes së vet, se nuk më pengon mua asgjë të dal në vete në zgjedhje, nëse ja hedh, çfarë po fiton, nëse ia hedh për të humbur do të thotë se është i marrë nga mendja e kokës, duhet izoluar. Njeriu nuk mund ta hedh për të humbur. Kur mendon gabim do të thotë se nuk është mirë nga mendtë e kokës. Ne kemi 140 kandidatë gati. Të gjitha partitë së bashku me LSI-në kanë një vlerë 130 mijë vota, të shpërndara në qarqe, diktojnë mandatin e deputetëve” tha ai.
