Mediat serbe vijojnë që të pasqyrojnë situatën politike në Kosovë.
Një artikull që ka tërhequr vëmendjen e opinionit publik është: “Kurti e Thaçi bëjnë ping-pong se kush duhet të jetë shefi i dialogut”.
Një raportim i tillë në mediat serbe vjen pasi kryeministri Albin Kurti në një letër që i ka dërguar emisarit të BE-së për dialogun, Mirsolav Lajcak, ka prezantuar ekipin për dialogun, që do ta drejtojë vetë, e në të cilin Presidenti i vendit do të jetë vetëm anëtar bashkë me kryetaren e Kuvendit, shkruan “Gazeta Express”.
Kujtojmë se pak më herët, Presidenca në Kosovë reagoi duke e quajtur Kurtin si kryeministër në dorëheqje i cili për prezantimin e një ekipi nuk është konsultuar fare me Presidentin e vendit.
Sipas zyrës së Thaçit një veprim i tillë është shkelje e hierarkisë kushtetuese.
“Meqë dje dhe sot kishte shumë pyetje drejtuar Zyrës së Presidentit lidhur me Ekipin Negociator të proklamuar nga kryeministri i shkarkuar, Zyra për Informim e Presidentit të Republikës së Kosovës sqaron opinionin publik vendor dhe ndërkombëtar, se kryeministri në largim nuk është konsultuar me Presidentin si udhëheqës i politikës së jashtme.
Kryeministri është i shkarkuar nga Kuvendi i Republikës së Kosovës dhe është kryeministër në largim i një qeverie në largim. Ai përveç që nuk është konsultuar me Presidentin si udhëheqës i politikës së jashtme, me këtë qasje është duke e shkelur edhe hierarkinë kushtetuese”, thuhej në reagimin e Presidencës.
