Me anë të një deklarate për shtyp, Shtëpia e Bardhë ka njoftuar se ka vrarë liderin e Al-Kaedës në Gadishullin Arabik, Qasim Al-Rimi. Vrasja e tij ka ndodhur gjatë një aksioni të ushtrisë amerikane në Jemen.
Sipas deklaratës, ekzekutimi i tij u bë me urdhër të presidentit Trump.
“SHBA-ja me urdhër të presidentit Donald Trump, zhvilloi një operacion kundër terrorizmit, në Jemen, ku u vra themeluesi dhe lideri i organizatës terroriste Al-Kaeda në Gadishullin Arabik, Qasim al-Rimi. Ai ishte bashkuar Al-Kaedas në vitet 1990-të dhe ka punuar me Osama bin Ladenin. Organizata terroriste Al-Kaeda nën udhëheqjen e Rimit në Gadishullin Arabik ka kryer sulme të pandërgjegjshme kundër civilëve, në Jemen. Gjithashtu, kjo organizatë ka kryer edhe shumë sulme kundër SHBA-së dhe forcave tona”, thuhet në deklaratë.
SHBA-ja duket e vendosur në luftën kundër terrorizmit. Adminstrata e Trump beson se pas kësaj goditje prezenca e Al-Kaedës do të dobësohet. Sipas tyre, SHBA-ja ka bërë hapa përpara në shkatërrimin e plotë të Al-Kaedës.
“Me vrasjen e Rimit interesat tona dhe aleatët tanë janë më të sigurt. Ne do të vazhdojmë të mbrojmë popullin amerikan, duke ndjekur gjurmët dhe duke eliminuar këto terroristë që përpiqen të na dëmtojnë”, thuhet në deklaratën e Shtëpisë së Bardhë.
