Kryeministri Edi Rama bashkë me kryebashkiakun e Tiranës, Erion Veliaj kanë vizituar ditën e sotme një familje të prekur nga tërmeti i 26 nëntorit.
Familja e Bedri Shkallës po strehohet në një kontenier në Farkë, pasi banesa e tyre u shpall e pabanueshme nga tërmeti. Kreu i qeverisë u shpreh se kjo është vetëm një zgjidhje provizore për banorët e prekur nga tërmeti. Sipas tij, montimi i shtëpive të reja do të nisë nga fillimi i pranverës.
“Kjo nuk është çështje parafabrikati apo tullash. Kjo është çështje që të kemi shtëpi më të mira, më të forta shtëpi antisizmike. Ato që do të ngrihem i kanë të gjithë ato parametra, janë shumë komode, i përdor Amerika, Gjermania , vende të tjera. Po ecim shumë shpejt me punët edhe besoj që në fillim të pranverës, fundi i marsit, fillimi i prillit me kismet me ndihmën e Zotit se tani çdo gjë se kemi në dorë por kemi në dorë të fillojmë të montojmë shtëpitë e reja”, tha ai.
Kryefamiljari i ofroi raki kryeministrit, teksa nuk munguan batutat nga Rama në lidhje me këtë gjë.
“Mos na jep raki tani se jemi në punë ne. Raki do pimë tani? Na shkatërrove me këtë rakinë o burr. Pastaj ne katunarët e Tironës nuk e kemi rakinë të mirë, nuk dimë me bo raki me thonë të drejtën. Thoshte një mik i babës tim ndjestë pastë, ishte andej nga jugu, që me rakinë e Tiranës ne andej lajmë xhamat, ujë me pak fjalë”, i tha kryeministri ndërsa mori për të pirë lëng frutash.
Nga ana tjetër, Veliaj deklaroi se ka filluar procesi i pastrimit të territoreve, ku do jenë edhe lagjet e reja.
“Ti që je në tokë tënde dhe që je tashmë në një lagje të urbanizuar do ta sjellim shtëpinë këtu, siç porositi kryeministri. Ndërkohë që për të tjerët do t’i grupojmë, p.sh në Baldushk ku më the që ke vëllain atje kemi gjetur një tokë dhe ato 50 familje më mirë me i sjellë në një vend”, tha ai.
