Gjykata ka nxjerrë masën e sigurisë “arrest me burg” për Nesim Demollarin, i cili akuzohet për vrasjen e nënës së tij. Para trupit gjykues, 54 vjeçari hedh poshtë akuzat e prokurorit.
Ai jo vetëm që nuk e pranon krimin, por e konsideron veten të pafajshëm, pasi i shërbente dhe kujdesej për të prej vitesh. Sipas Demollarit, nëna vuante nga sëmundja e sklerozës.
“Nuk janë të sakta çfarë tha prokurori. Mamanë e gjeta në korridor. E ushqeja unë. Bënte veprime të pandërgjegjshme. Me quante Goni, jo Nesim. Dilte nga shtëpia vetë, ishte me sklerozë, binte dhe rrëzohej vetë.
E gjeta midis banjos dhe korridorit të shtrirë. E çova në dhomë. I shërbej prej vitesh. Kishte renë nga divani në kokë. Dy ditë më parë vrau syrin. Nuk e kam vrarë, vdiq vetë. Pasi vdiq, mora vëllanë në telefon.
Kam punuar 20 vite në Greqi. Jam i pafajshëm. Të gjykohem i lirë. Dua të punoj, se nuk kam të ardhura”, mësohet të ketë thënë ai. Në Gjykatë kanë dhënë dëshmi edhe fqinjët e viktimës, të cilët janë shprehur se Nesim Demollari e ka qëlluar për vdekje nënën e tij.
