Pas vendimit të Presidentit Meta, menjëherë kryeministri Rama mbajti një takim kokë më kokë për plot 90 minuta me ambasadorët. Ky takim i thirrur nga Rama, ishte për ti informuar për shkeljet Kushtetuese, që sipas tij, Presidenti Meta ka bërë.
Sot kreu i shtetit Ilir Meta firmosi vendimin për dekretimin e zgjedhjeve lokale të 30 qershorit, me argumentin se shtyrja e zgjedhjeve nuk krijon vakum në qeverisjen vendore, ndërsa shtoi se ky vendim është mjeti emergjent për zgjidhjen e krizës politike.
Por pas këtij akti, Rama thirri Kryesinë e PS, nga e cila u deklarua se të enjten ne Kuvend do te nisin procedurat per shkarkimin e Presidentit Meta. Por Meta nuk e ka lënë me kaq. Në një tjetër reagim, tashmë në rrjetet sociale, ai nënvizon faktin se Kushtetuta do të mbrohet deri në fund, me qetësi dhe shqiptari.
“Në këtë ditë të veçantë për kombin tonë, në 141-vjetorin e Lidhjes Shqiptare të Prizrenit dhe në prag të kremtimit të 20-vjetorit të çlirimit të Kosovës, pata kënaqësinë e veçantë të zhvilloja një takim të ngrohtë e vëllazëror me një grup studentësh e profesorësh nga të gjitha trevat shqiptare, të Kolegjit Universitar AAB në Prishtinë.
I lumtur të ndanim qëndrimin se rinia duhet të jetë promotore e proceseve demokratike dhe integruese në të dy vendet tona dhe se është shumë e rëndësishme që Shqipëria e Kosova të forcojnë bashkëpunimin në të gjitha fushat.
Të bëjmë të gjitha përpjekjet për të rritur shpresat dhe për t’i hapur perspektivat rinisë, për të ndërtuar të ardhmen në vendet tona.
Lidhur me shqetësimin e tyre për zhvillimet në Shqipëri i garantova se Kushtetuta do të mbrohet deri në fund me qetësi dhe shqiptari”.
