Kreu i grupit parlamentar të Partisë Socialiste, Taulant Balla zhvilloi sot një takim me banorët e qytetit të Elbasanit, në kuadër të fushatës zgjedhore.
Gjatë fjalës së mbajtur, Balla u shpreh i bindur se zgjedhjet vendore të 30 qershorit do të zhvillohen, pavarësisht vendimit të presidentit Meta për të shfuqizuar dekretin e zhvillimit të tyre.
Ndër të tjera, Balla deklaroi se e veçanta e këtyre zgjedhjeve, është fakti se kemi një kundërshtar të rrezikshëm që do t’i heqë popullit të drejtën e votës.
“Parlamenti është legjitim se buron nga zgjedhje legjitime, por është funksional në të gjitha atributet e veta. Këtu nga kjo lagje e nderuar, dua ta them shumë troç, zgjedhjet e 30 qershorit, nuk i luan as topi, jo Bamir Topi, as Ilir Meta, pavarësisht se për Bamirin kam respekt për mënyrën si është sjell si President.
Zgjedhjet nuk mund të lëvizin, këtu do zhvillohen zgjedhje normale. Të jeni të sigurt se kandidatura është shumë e mirë. Qazimi ka bërë punë të shkëlqyer i jam mirënjohës. Ju them një gjë, jo vetëm zgjedhjet e 30 qershorit, që janë konfirmim edhe me ta edhe pa ata, ne këtu në Elbasan do kishim rezultat të shkëlqyer. Këto zgjedhje kanë specifikë të veçantë. Kemi kundërshtarin më të rrezikshëm, është i pari që pas 30 vitesh do ti heqë popullit të drejtën e votës”, deklaroi Balla.
