Nga Shkodra, kryeministri Rama njoftoi se sporteli i Kadastrës do të mbyllet e ndërsa qytetarët do të marrin shërbimin online. Teksa bëri një prezantim të ligjit për Bashkëqeverisjen, Rama tha se përmes këtij ligji synohet t’i jepet fund radhës në sportele dhe që të gjitha shërbimet për qytetarët të kalojnë online. Rama premtoi që brenda këtij mandati, titulli i pronësisë të vijë në telefon e kompjuter, dhe mos të ketë më asnjë lidhje me godinat.
“Për fazën e aplikimit, sot s’ka më nevojë të lëvizësh nga shtëpia, për të kërkuar një shërbim se aplikon drejtpërdrejt. E po punojmë për të mbyllur ciklin edhe në fazën e dorëzimit online të shërbimit.
Sot s’ka nevojë të shkosh në Kadastër fizikisht, për të aplikuar për një shërbim ndaj dhe Kadastra do mbyllet si sportel, s’do ekzistojë më për të aplikuar e gjithë sekserët e kanalet e llumit ku qytetarët kanë qenë të detyruar të kalojnë për të zgjidhur hallet me Kadastrën s’do kenë më mundësi”, tha Rama.
“Ndërkohë nëse sot aplikon për të marrë një titull pronësie, ende s’është e mundur që përgjigjen ta marrësh po në kompjuter apo në telefon, pra duhet ta marrësh fizikisht. Ajo që po bëjmë tani kemi vënë një fond plus procesit të digjitalizimit të plotë të Kadastrës e duam që brenda këtij mandati, titulli i pronësisë të të vijë në telefon e kompjuter e mos ketë më asnjë lidhje me godinat, ti aplikon e brenda një minuti, 60 sekondash ty të vjen letra. Kjo është faza tjetër. Por ama në këtë fazë ku jemi, është e mundur të mos shkosh fare në Kadastër për të aplikuar, aplikon online e për këtë arsye dhe sportelet e Kadastrës për aplikimet do mbyllen”, shtoi kryeministri.
