Mbretëria e Bashkuar ka publikuar bilancin e viktimave për 24 orët e fundit dhe shifrat vijojnë të jenë të larta.
Sipas mediave britanike, 209 njerëz kanë ndërruar jetë brenda orëve të fundit duke e çuar në 1,228 numrin total të vdekjeve.
Shifra ishte më pak se rritja rekorde e së shtunës, me 260 viktima, e cila mund të sjellë një shpresë se rritja e vdekjeve mund të stabilizohet së shpejti.
Në Mbretërinë e Bashkuar numërohen deri më tani më shumë se 19,500 raste infektimi. Ndërkohë, një kompani e analizës së të dhënave për kujdesin shëndetësor “Edge Health”, ka deklaruar se numri real i të infektuarve mund të jetë më shumë se 1.614.505.
Kryeministri Boris Johnson, i izoluar pas testimit pozitiv për Covid-19, tha se “gjërat do të përkeqësohen para se të përmirësohen”.
Koronavirusi po shkakton një tragjedi globale, teksa nga dita në ditë me mijëra njerëz po humbin jetën si pasojë e këtij virusi.
Për momentin situata duket më e rëndë në Evropë, ku edhe po regjistrohen viktimat më të shumta. Italia dhe Spanja mbajnë vendin e parë për numrin më të madh të viktimave të shënuara nga koronavirusi.