Mbledhja e Kryesisë së Partisë Socialiste ka zgjatur rreth 90 minuta, por është mbyllur pa emra kandidatësh për kryetarë bashkie. Pritej që në fund të bëheshin publikë emra kandidatësh, burime nga PS pohuan se do të vendosen në mbledhjen e ardhshme e cila do të jetë të shtunën. Lista e kandidatëve është hartuar tashmë dhe pritet vetëm të firmoset nga lidershipi i PS-së.
Nga bashkitë që PS drejton aktualisht pritet që të rikandidojnë mbi 20 kryebashkiakë. Ndërkohë në garën e 30 qershorit socialistët do të kandidojë me dy prefektët në detyrë në bashkitë e Elbasanit dhe Shkodrës, përkatësisht Gledian Llatja dhe Valdrin Pjetri.
Socialistët kanë vendosur që në përballjen elektorale t’u besojnë kandidimin 6 deputetëve, të cilët pas zyrtarizimit ligjor do të duhet të dorëzojnë mandatin e ligjvënësit. Kryesia e PS-së mësohet se do të pasohet me mbledhjen e Asamblesë Kombëtare, që mendohet të zhvillohet të premten më datë 10 Maj.
PS shqyrton kandidaturat e saj pak ditë para afatit ligjor, 13 Maj, të depozitimit të listave pranë Komisionit Qendror të Zgjedhjeve. Partia Socialiste është e përqendruar në zgjedhjet lokale, pavarësisht se partitë kryesore opozitare nuk do të jenë pjesë e garës politike, pasi nuk janë regjistruar në KQZ dhe kanë deklaruar se do pamundësojnë zgjedhjet.
