Në Francë numri i viktimave nga koronavirusi i ka kaluar 2 mijë.
Nga të dhënat e 24 orëve të fundit rezulton se kanë humbur jetën edhe 319 persona duke e çuar në 2,314 totalin.
Shifrat e rasteve të reja të të infektuarve nuk janë gjithashtu optimiste. 4,649 raste të reja në një ditë ndërsa totali është rreth 37 mijë e 700 njerëz. Nga këta 5, 704 janë shëruar.
Në këtë panoramë të zymtë për Europën, Presidenti Makron ka bërë thirrje për më shumë solidaritet duke propozuar se një borxh i përbashkët ose buxheti i BE mund të përdoret për të ndihmuar vendet e prekura më keq.
“Unë nuk dua një Evropë egoiste dhe të ndarë”, tha Macron në një intervistë me tre gazeta italiane.
“Ne nuk do ta kapërcejmë këtë krizë pa solidaritet të fortë evropian”, i tha ai Corriere della Serra, La Stampa et La Repubblica.
Ai gjithashtu theksoi se “Franca qëndron përkrah Italisë”.
Komentet e tij vijnë pasi liderët e BE debatuan të enjten në lidhje me krijimin e një instrumenti të borxhit të përbashkët – të quajtur “bono korona” – për të ndihmuar në financimin e përgjigjes ndaj pandemisë së koronavirusit.
Macron tha se 10 vende të eurozonës që përfaqësojnë 60 përqind të PBB-së së tregut së përbashkët mbështesin idenë e bono koronave në videokonferencën e së enjtes. Vende të tjera, përfshi Gjermaninë dhe Holandën, e kanë kundërshtuar publikisht këtë koncept.
“Ne kemi vendosur të vazhdojmë këtë debat thelbësor, në nivelin më të lartë politik, në javët e ardhshme. Ne nuk mund ta braktisim këtë betejë”, tha Macron.
“A do të ulet Bashkimi Evropian, eurozona, thjeshtë në një institucion monetar dhe një sërë rregullash që lejojnë secilin shtet të veprojë vetë? Apo do veprojmë së bashku për të financuar shpenzimet tona, nevojat tona në këtë krizë jetësore? Unë dua që zgjedhja e solidaritetit të bëhet plotësisht”, tha ai.
Macron tha se ndihma mund të vijë në formën e “një kapaciteti të përbashkët borxhi, pavarësisht nga emri i tij, ose një rritje në buxhetin e Bashkimit Evropian për të lejuar mbështetje të vërtetë për vendet më të prekura nga kjo krizë”. /Opinion
