Është finalizuar mbrëmjen e djeshme edicion i 58-të i Festivali të Këngës, ku fituese u shpall Arilena Ara.
Mirëpo fitorja e saj ka ngjallur jo pak polemika teksa një tjetër pretendente e madhe ishte edhe Elvana Gjata. Kjo e fundit u rendit e dyta, ndërsa vendi i tretë shkoi për 15-vjeçaren Sara Bajraktari.
Shumë nga personat që nuk ishin dakord me fitoren e Arilenës akuzuan moderatoren Alketa Vejsiu, e cila ishte edhe bashkëproducente këtë vit, se çmimin ja kishte ‘siguruar’ ajo Arilenës.
Nuk vonoi edhe reagimi i Alketës, e cila postoi në Instagram një foto të Elvana Gjatës. Krahas fotos Alketa uron Arilenën për fitoren dhe shpreh mirënjohjen e saj për Elvana Gjatën duke e cilësuar këngën e saj si ‘festën e Festivalit’.
https://www.instagram.com/p/B6aie-hnTWh/?utm_source=ig_web_copy_link
“I uroj suksese Arilenës për fitoren! Sa më mbarë për Shqipërinë në Eurovision!
Por nuk mund të lë pa falenderuar Elvana Gjatën! Atë që u klikua në 2 javë më shumë se të gjithë, 3 milion e 500 mijë herë! Nuk mund ta mohoj që kënga e saj ishte festa e këtij Festivali! Që Elvana ishte lajmi i këtij edicioni, zëri dhe energjia e rinisë që vallëzoi në një sallë të ngurtë, që bëri bashkë Shqipërinë, Kosovën dhe Diasporën! Garat shpallin fitues, por jo humbës; sepse hitet nuk vdesin kurrë”, shkruan ajo.
Moderatorja sqaron se ajo nuk ka dorë në vendimin e marrë nga juria, teksa i kërkon edhe publikut falje. Ajo i drejtohet Elvanës se duhet të ndihet krenare, pasi 3 anëtarët e jurisë së Eurovision i kanë dhënë 18 pikë.
“Pas këtij Festivali që e kam bërë me shpirt, mund të them që s’kam qenë dhe s’do bëhem kurrë pale me asnjë juri, për asnjë motiv!
Besoj tek meritokracia dhe më vjen thellësisht keq që në platformën e këtij Festivali nuk munda dot ti jap zë, zërit të publikut! Më falni nëse ju kam zhgënjyer! Kuptoj dhe respektoj ndjeshmërinë tuaj! Mi kurseni akuzat ju lutem! Unë nuk isha juria, dhe jurinë se zgjodha unë!
Elvana Faleminderit! Ti erdhe në këtë Festival sepse besove tek vizioni im! Ti s’kishe nevojë për garë për të konfirmuar atë që je, sepse ti thjesht Je! Dhe për më tepër ti duhet të ndihesh fituese sot sepse të 3 anëtarët e jurisë së Eurovision të kanë dhënë 18 pikë. Ato 2 pikët e Shqipërisë, jam pa fjalë”, shton ajo më tej.
Mirëpo si duket ky postim nuk është pritur mirë nga fituesja e këtij Festivali. Me një kërkim të thjeshtë në Instagram vërehet se Arilena nuk e ndjek më në këtë platformë Alketën.
Ndërsa nga ana tjetër, prezantuesja vijon ta ndjekë këngëtaren.
Gjatë ditës së sotme u bënë publike edhe votat e 5 anëtarëve të jurisë. Në këto fletë votimesh duket se 3 anëtarët e huaj kanë votuar maksimalisht Elvana Gjatën.
Por ajo që i ka prerë rrugën drejt fitores Elvanës ka qenë një anëtare nga Shqipëria, e cila e ka vlerësuar me vetëm 2 pikë këngën.
Kështu Arilena ka dalë në rezultatin final me 3 pikë më shumë se Elvana. Kjo e fundit pas ndarjes së çmimeve u mbyll në dhomë dhe bojkotoi post-partyn.
