Pas përplasjeve në selinë blu, sekretari i PD-së Roland Bejko ka dhënë një prononcim të shkurtër për mediat, ku tha se sulmi është produkt i ish-kryeministrit. Ai u shty dhe u godit fizikisht nga militantë të Sali Berishës.
Për të, ky është produkt i Sali Berishës, dhe paaftësi e menaxhimit e gjithë elitës së PD-së. Teksa Roland Bejko ka tentuar të futet në seli, në mbledhjen e thirrur nga Lulzim Basha, ai është goditur nga disa protestues. Nga turma e madhe e njerëzve, Bejko nuk ka arritur të futet në seli dhe është larguar prej saj.
“Unë kam qenë njeriu që e kam mbështetur Berishën në 97,’ por ka një kohë që boll është boll. Erdha të futesha në seli.
Nuk e dija që kisha kaq shumë njerëz, u gjenda përballë këtij reagimi. Do i drejtohem vetëm Berishës të mbajë njerëzit nën kontroll!
Se këtë ma ka bërë vetëm turma e Enveristëve që më ka nxjerrë jashtë nga greva. E bëjnë për ata oligarkë të partisë që i kanë shtypur e i kanë mjelur këta. Njerëz që kanë dhënë shumë për PD.
Faj ka ai që i ka sjellë këtu. Jam befasuar kur pash që më qëlloi njeriu që kam mbajtur me bukë. Kjo që ndodh tani më ka ndodhur në shkurt të ‘91. Ishim duke organizuar grevën e studentëve kundër Enver Hoxhës. Kam qenë organizator.
Kur po bënim atë grevë, erdhën mbështetës të Hoxhës dhe na kanë shkelur me këmbë. Ka ardhur turma e enveristëve, na ka nxjerrë jashtë, kemi që në ‘90 që luftojmë me këtë njeri dhe sot marrim sharje. Ky është produkt i Sali Berishës dhe paaftësi e menaxhimit e gjithë elitës së PD, që e kanë lënë partinë në këtë situatë”, tha Bejko.
Ndërkohë që sekretari i PD-së po jepte prononcimin për mediat, një prej militantëve të Berishës tentoi ta godiste me çadër.
