Dy sulme të armatosura kanë tronditur mbrëmjen e djeshme Gjermaninë. Ngjarja e rëndë ka ndodhur në qytetin Hanau, ku 9 persona janë vrarë dhe disa të tjerë kanë mbetur të plagosur.
Sipas mediave gjermane, të shtënat me armë ndodhën në dy lokale nga i njëjti person.
Sulmi i parë ndodhi në lokalin ‘Midnight shisha bar’ në qendër të qytetit, ndërsa i dyti në ‘Arena Bar & Cafe’ në një lagje tjetër. Dëshmitarët raportuan se kishin dëgjuar disa të shtëna me armë zjarri.
Autori i dyshuar u gjet i vdekur në shtëpinë e tij, së bashku me trupin e një personi të dytë. Policia thotë se nuk ka autorë të tjerë, dhe se hetimi po vazhdon.
Gazeta “Bild” raporton se autori i dyshuar ishte një shtetas gjerman. Arsyet e sulmeve me armë janë të paqarta.
