Një burrë indonezian i quajtur Khoirul Anam, ka bërë bujë në mediat sociale duke u ‘martuar’ me tenxheren e tij të orizit. Khoirul Anam ndau një seri fotografish javën e kaluar, që e tregojnë atë të veshur me stoli të mrekullueshme të dasmës për ceremoninë. Tenxherja e orizit me ngjyrë të bardhë me të cilën ai u martua, ishte gjithashtu e zbukuruar.
Fotot që ai shpërndau në Facebook, i tregojnë ata të ulur krah për krah. Njëra nga fotografitë e tregon atë duke puthur tenxheren. Në një tjetër, pajisja vendoset pranë tij ndërsa ai nënshkruan letrat e tyre të martesës.
Në një mbishkrim të shkurtër që shoqëronte postimin, Anam tha se ai vendosi të martohej me tenxheren e tij të orizit pasi ishte “E drejtë, e bindur, e dashur dhe e mirë në gatim”.
Fotografitë ngjallën shumë argëtim në Facebook, duke mbledhur afro 10.000 ‘pëlqime’ dhe mbi 1200 komente.
Sado e çuditshme të duket, historia u bë më e famshme kur katër ditë më vonë, Anam ‘u divorcua’ nga pajisja e kuzhinës, duke cituar se mund të gatuante vetëm oriz. Burri indonezian njoftoi divorcin në Facebook.
Sigurisht, e gjithë dasma dhe divorci pasues nuk ishin asgjë më shumë se një marifet i mediave sociale për argëtim. Uebfaqet lokale të lajmeve raportojnë se Anam është një njeri i famshëm në Indonezi.
Burimi i lajmit: NDTV. Përshtatur nga Tirana Today
