Ditë më parë mediat elektronike dhe të shkruara njoftuan se Kosova dhe Shqipëria do të kenë një kalendar të përbashkët kulturor për vitin 2018. Kështu në Prizren në ambientet e Lidhjes Shqiptare të Prizrenit, ministri i Kulturës, Rinisë dhe Sportit i Republikës së Kosovës, Kujtim Gashi, dhe ministrja e Kulturës e Republikës së Shqipërisë, Mirela Kumbaro – Furxhi, nënshkruan Protokollin e bashkëpunimit për Kalendarin e përbashkët kulturor-vjetor, të pestin vit radhazi.
Përmes këtij akti, dy vendet janë pajtuar për përfshirjen e aktiviteteve, i cili është i bazuar në “Deklaratën e përbashkët për bashkëpunim dhe partneritet strategjik ndërmjet Këshillit të ministrave të Republikës së Shqipërisë dhe Qeverisë së Kosovës” nënshkruar në Prizren me datë 11 janar 2014.
Bëhet me dije se në saje të kalendarit të përbashkët kulturor do të realizohen aktivitete në fushën e trashëgimisë, që kanë të bëjnë me digjitalizimin e trashëgimisë dhe trajnime, dhe edukim në fushën e restaurimit dhe konservimit, ekspozita në fushën e arkeologjisë dhe të muzeve, në fushën e teatrove do të mbahet Festivali mbarëkombëtar i teatrit dhe do të realizohen shfaqje teatrale si në Kosovë ashtu edhe në Shqipëri, e në fushën e filmit do te jepen premierat e pesë filmave. Në fushën e artit pamor do të realizohet një ekspozitë në Shqipëri. Këto aktivitete do t’i bartin institucionet kombëtare përkatëse të kulturës, transmeton vetëm Koha Ditore.
Nënshkrimi i Protokollit paraqet një vazhdimësi të bashkëpunimit të të dyja vendeve tona në fushën e kulturës me synimin e avancimit dhe promovimit të kulturës kombëtare brenda hapësirës shqiptare, duke e konsideruar si nxitje për veprimtari të tjera në nivel mbarëkombëtar, ku kultura duhet të jetë model për të tashmen dhe të ardhmen. Organizimi i veprimtarive të tilla kulturore mundëson prezantimin, njohjen dhe vetënjohjen shqiptare, që paraqet nderim ndaj veprimtarisë kulturore kombëtare në përgjithësi. Andaj, një akt i tillë është për t’u përshëndetur, sepse është në favor të bashkëpunimit ndërshtetëror në përgjithësi dhe integrimit kulturor mbarëkombëtar në veçanti.
