Ministria e Shëndetësisë në Maqedoninë e Veriut ka bërë me dije se nuk ka raste me koronavirus në vend.
Mbrëmjen e djeshme një person që u kthye nga Milano në Shkup, u dyshua si i prekur nga koronavirusi. Ai u shtrua mbrëmë në Klinikën Infektive në Shkup, ku edhe iu nënshtrua testeve për koronavirus.
Por ministria e Shëndetësisë bën me dije se rezultatet e analizave kanë dalë negative dhe se pacienti ndodhet në gjendje të mirë shëndetësore. Udhëtari ka kaluar përmes kamerës termale në aeroport, e cila nuk ka regjistruar simptoma të sëmundjes.
Simptomat e para i ka ndjerë pas mbërritjes në shtëpi, duke e bërë që të paraqitej në Klinikën Infektive në Shkup. Nga arritja e tij në klinikë, pacienti është vendosur në izolim, pas çka i janë bërë teste në bazë të protokollit.
