Ish-ministri i Drejtësisë, Ylli Manjani, i ka dalë në mbrojtje nënkryetarit të LSI-së Luan Rama i cili sot deklaroi tërheqjen nga kjo forcë politike, për shkak të humbjes në zgjedhjet e 25 prillit. Manjani thotë qartë se Luan Rama nuk ka asnjë përgjegjësi politike për humbjen e mandatit të LSI-së në Vlorë. E për rrjedhojë, vijon argumentin Manjani, shqiptarët në zgjedhjet e fundit gjykuan LSI-në dhe jo kandidatët e saj. Ish-ministri shprehet më tej se Luan Rama nuk është vlonjat, dhe se shkoi atje si përfaqësues politik dhe u shpall armik nga partia e tij, para votimit. Nënkryetari i Lëvizjes Socialiste për Integrim, Luan Rama është larguar nga të gjitha funksionet në LSI pas humbjes në zgjedhje. Lajmin e ka njoftuar vetë Rama me anë të një statusi në rrjetet sociale ku shkruan se si drejtues i duhet të mbajë përgjegjësi, edhe në rast se nuk është përgjegjës për këtë humbje.
Statusi
Luan Rama, pavarësisht arësyeve që parashtron në dorëheqjen së Tij nga detyrat partiake, NUK KA ASNJË PËRGJEGJËSI politike për humbjen e mandatit të LSI në Vlorë.
Në parim shqiptarët në zgjedhjet e fundit gjykuan LSI, jo kandidatët e saj.
E çfarë gjykimi, pa!?
Në Vlorë, ekuacioni u bë edhe më i vështirë kur 2 javë para ditës së votimit Luani u shpall “tradhëtar”!!!!
Se kë e çfarë tradhëtoi Luani një dreq e di!? Them dreq se nuk dua të ngatërroj zotin me këto punë…
Të shpallesh armik para votimit, të dilet në thirrje publike “mos votoni Luanin” dhe, të mendosh të marrësh dhe mandat këtë vetëm një politikë e çakërdisur e bën!
Ndaj them se Luani nuk ka asnjë përgjegjësi.
Ai nuk është vlonjat dhe e nuk mori votat e shokëve të lagjes, që të jetë përgjegjës. Ai shkoi atje si përfaqësues politik dhe u shpall armik nga partia e tij, mu para votimit. LSI bënte thirrje të votohej nr. 2 i listës…
Ja, kaq e thjeshtë është!
Nga ana tjetër, Luani s’ka përse spjegohet gjatë për dorëheqjen e Tij, sepse ai nuk është i dorëhequr, por i tradhëtuar!
I tradhëtuar, por edhe i dënuar për tradhëti…
