Një grup deputetësh të PD-së kanë kërkuar heqjen e mandatit të deputetes socialiste Olta Xhaçka, për shkak se bashkëshorti i saj ka përfituar statusin e investitorit strategjik.
Mbledhja e Këshillit të Mandateve, i cili është mbledhur për të vendosur për mandatin e deputetes Olta Xhaçka, është shoqëruar me debate. Balla ka kërkuar nga deputetët e PD-së që të provojnë me fakte që Xhaçka ka fituar qoftë edhe një qindarkë, dhe kjo ka ngjallur debate mes palëve në sallë.
Pjesë nga debatet:
Balla: Përgjigjja ishte e plotë, e qartë dhe na konfirmon faktin se nuk kemi të bëjmë me parashikimet e nenit, pika 73.
Ndërhyn Bardhi.
Balla: Unë nuk ju ndërpreva, ju thoni gjithçka. Pra, në vlerësimin tim pyetja lidhet me parashikimet e nenit, pika 73, ku thuhet se fitimi është i matshëm me para.
Ndërhyn sërish Bardhi.
Balla: Nuk shkon kështu, e ndërpresim pra. Merreni me qetësi. E shoh që nuk e keni seriozisht këtë punë, e di që nuk e keni seriozisht, por mësohuni me rregulla. Dhe po më ndërpreve dhe njëherë tjetër, kjo mbledhje ndërpritet. Nuk shkon tani, se na ka bërë dhe Saliu bashkëpunëtor.
Kujtojmë këtu se duke iu referuar deputetëve të PD-së, shoqëria në pronësi të bashkëshortit të ministres Xhaçka ka përfituar masën mbështetëse të lejimit të përdorimit të bregut para hotelit me 5 yje në Himarë, me të drejtën për ta përdorur atë për një periudhë 30-vjeçare.
