Manastirliu takon Kalon pas largimit nga Komiteti Teknik: Pimë një kafe pune

Ditën e sotme, mjeku i njohur Tritan Kalo dha dorëheqjen nga Komiteti Teknik i Ekspertëve, pasi sipas tij, është politika ajo që po i përçan mjekët.

Ndërkohë ministrja e Shëndetësisë Ogerta Manastirliu ka publikuar një foto me Kalon, teksa thotë se janë për një kafe pune për të ndarë mendime e këshilla.

Ajo e falenderon për punën e madhe që ka bërë gjatë këtij viti të vështirë dhe shprehet se ai do të jetë gjithnjë i gatshëm të japë kontributin e tij për shëndetësinë.

Postimi i Manastirliut në rrjetin social, Facebook

Një kafe pune me Prof. Tritan Kalon, që prej shumë kohësh i kemi periodike, për të ndarë mendime e këshilla. Mirënjohje për kontributin e tij të vlefshëm në Komitetin Teknik të Ekspertëve, përgjatë një viti sfidues dhe aspak të lehtë të përballjes me pandeminë Covid19.

Prof. Kalo do vazhdojë të japë kontributin e tij në shërbim të pacientëve, si gjithmonë me profesionalizmin dhe ndjenjën e lartë të përgjegjësisë. Bashkë kemi një thirrje: Ju lutemi zbatoni masat.